Govindāṣṭakam
Ādi Śaṅkara
For Janmāṣṭamī pāṭha.
1
Satyaṃ jñānamanantaṃ nityamanākāśaṃ paramākāśaṃ Goṣṭhaprāṅgaṇariṅkhaṇalolamanāyāsaṃ paramāyāsam Māyākalpitanānākāramanākāraṃ bhuvanākāraṃ Kṣmāmā nāthamanāthaṃ praṇamata govindaṃ paramānandam
2
Mṛtsnāmatsīheti yaśodātāḍanaśaiśava-santrāsaṃ Vyāditavaktrālokitalokālokacaturdaśalokālim Lokatrayapuramūlastambhaṃ lokālokamanālokaṃ Lokeśaṃ parameśaṃ praṇamata govindaṃ paramānandam
3
Traiviṣṭaparipuvīraghnaṃ kṣitibhāraghnaṃ bhavarogaghnaṃ Kaivalyaṃ navanītāhāramanāhāraṃ bhuvanāhāram Vaimalyasphuṭacetovṛttiviśeṣābhāsamanābhāsaṃ Śaivaṃ kevalaśāntaṃ praṇamata govindaṃ paramānandam
4
Gopālaṃ prabhulīlāvigrahagopālaṃ kulagopālaṃ Gopīkhelanagovardhanadhṛtalīlālālitagopālam Gobhirnigadita-govindasphuṭanāmānaṃ bahunāmānaṃ Godhīgocaradūraṃ praṇamata govindaṃ paramānandam
5
Gopīmaṇḍalagoṣṭhībhedaṃ bhedāvasthamabhedābhaṃ Śaśvadgokhuranirdhūtodgatadhūlīdhūsarasaubhāgyam Śraddhābhaktigṛhītānandamacintyaṃ cintitasadbhāvaṃ Cintāmaṇimahimānaṃ praṇamata govindaṃ paramānandam
6
Snānavyākulayoṣidvastramupādāyāgamupārūḍhaṃ Vyāditsantīratha digvastrā dātumupākarṣantaṃ tāḥ Nirdhūtadvayaśokavimohaṃ buddhaṃ buddherantaḥsthaṃ Sattāmātraśarīraṃ praṇamata govindaṃ paramānandam
7
Kāntaṃ kāraṇakāraṇamādimanādiṃ kālaghanābhāsaṃ Kālindīgatakāliyaśirasi sunṛtyantaṃ muhuratyantam Kālaṃ kālakalātītaṃ kalitāśeṣaṃ kalidoṣaghnaṃ Kālatrayagatihetuṃ praṇamata govindaṃ paramānandam
8
Bṛndāvanabhuvi bṛndārakagaṇa bṛndārādhita vandye'haṃ Kundābhāmalamandasmerasudhānandaṃ suhṛdānandam Vandyāśeṣamahāmunimānasavandyānandapadadvandvaṃ Vandyāśeṣaguṇābdhiṃ praṇamata govindaṃ paramānandam
9
Govindāṣṭakametadadhīte govindārpitacetā yaḥ Govinda acyuta mādhava viṣṇo gokulanāyaka kṛṣṇeti Govindāṅghri-sarojadhyāna-sudhājaladhauta-samastāghaḥ Govindaṃ paramānandāmṛtam antaḥsthaṃ sa tamabhyeti
